"Oğlanlara güvən yoxdur" | Ev sahibləri oğlan tələbələrə ev verməkdən imtina edirlər - Baku TV

Yeni tədris ilinin başlamasına hələ iki aydan çox vaxt qalsa da, kirayə mənzil bazarında artıq hərəkətlilik müşahidə olunur.

Sirr deyil ki, bölgələrdən paytaxta təhsil almağa gələn tələbələr ən azı bir ay əvvəldən kirayə mənzil axtarmağa başlayırlar. Elanlarda isə daha çox qız tələbələrə üstünlük verildiyi qeyd olunur. Hətta bəzən eynitipli mənzil oğlan tələbələrə daha yüksək qiymətə təklif edilir.

Baku TV “Mənzilinizi oğlan tələbələrə kirayə verərsinizmi?” sualı ilə paytaxt sakinləri arasında sorğu keçirib.

“Qızlara ev verirlər, çünki əksəriyyəti səliqəli olur. Oğlanların isə çoxu evi ayı kimi saxlayır, hər tərəfi dağıdır. Bundan sonra kim onlara ev versin? Qızlara 500 manata verilən mənzil oğlanlara, bəlkə də, 550-600 manata təklif olunur”, – sakinlərdən biri bildirib.

“Yəqin ki, evdə nadinclik edirlər. Oğlanlara güvən yoxdur, yaxud da mənzili pinti saxlayırlar”, – deyə digər sakin qeyd edib.