Şagirdlərdən təşəkkür: soydaşımız Gürcüstanda ödənişsiz təhsil mərkəzi açıb

Gürcüstanda soydaşlarımızın kompakt yaşadıqları Marneuli rayonunun Kürtər kəndində 75 yaşlı soydaşımız təhsil mərkəzi yaradıb.

Riyaziyyat üzrə fəlsəfə doktoru İsmixan Abdullayev artıq bir ilə yaxındır ki, təmənnasız olaraq 70-dən çox şagirdə riyaziyyat, şahmat və digər fənnləri tədris edir.

Əslən Marneuli rayonunun Kürdlər kəndindən olan İsmixan müəllim Azərbaycan vətəndaşıdır. O, uzun illər Qazax və Ağstafa müəllimlər institutunda rəhbər vəzifələrində çalışıb. Təqaüdə çıxdıqdan sonra Gürcüstana qayıdan soydaşımız deyir ki, təhsil mərkəzi açmaqda məqsədi peşəsinə olan sevgisidir.

İsmixan müəllim fədakardır. Bildirir ki, Azərbaycandan aldığı təqaüd ailəsinin qayğılarına yetir. Ona görə də heç bir şagirdindən təmənna gözləmir.

Qeyd edək ki, İsmixan Abdullayev bundan əvvəl öz evində şagirdlərə dərs deyib. Qısa zamanda ona müraciət edənlərin sayı artdığından o, öz hesabına təhsil mərkəzi açmaq qərarına gəlib.