Sağlam kilo vermək istəyənlər bunları etsin | Diyeta saxlayanların diqqətinə

Limerik Universitetinin tədqiqatçıları müəyyən ediblər ki, arıqlamaq üçün pəhriz zamanı kalori miqdarını kəskin şəkildə azaltmaq lazım deyil. Enerji qəbulunu gündə 100-dən 200 kaloriyə qədər azaltmaqla da müsbət nəticələr əldə etmək mümkündür.

Nə qədər kalori istehlak ediləcəyini müəyyən etmək üçün bazal metabolizm sürəti və fiziki fəaliyyətin birləşməsi olan ümumi enerji xərclərini nəzərə almaq vacibdir. Lakin onu da bilmək lazımdır ki, kalori qəbulu azaldıqda bədən uyğunlaşmağa başlayır, maddələr mübadiləsi yavaşlayır və arıqlamağı çətinləşdirə biləcək hormonal mexanizmlər işə düşür. Məsələn, toxluğu tənzimləyən leptinin səviyyəsi azala, iştahı stimullaşdıran qrelinin səviyyəsi isə yüksələ bilər.

Bu çətinliklərə baxmayaraq, düzgün tərtib edilmiş pəhriz balansını qorumaqla çəki itirmə prosesini davam etdirmək olar. Alimlər bunun üçün əzələ kütləsini saxlamaq, zülal və liflə zəngin qidalar yemək, həmçinin kaloriləri orta səviyyədə məhdudlaşdırmağın vacib olduğunu vurğulayırlar.

Tədqiqatçıların fikrincə, tədricən dəyişikliklərin həyata keçirilməsi nəinki daha təsirli olur, həm də dözmək asandır, bu, xüsusilə uzunmüddətli çəki saxlamaq üçün vacibdir. Bədən çəkisinin hətta kiçik – 5-10% azalması metabolik sağlamlığı əhəmiyyətli dərəcədə yaxşılaşdıra və xroniki xəstəliklərin riskini azalda bilər.