Sahibə Qafarova Fazil Mustafanı xəstəxanada ziyarət edib

Milli Məclisin sədri Sahibə Qafarova bu gün Fazil Mustafanı müalicə olunduğu xəstəxanada ziyarət edib. Onun ailə üzvləri ilə görüşüb.

Fazil Mustafanın vəziyyəti və müalicəsinin gedişi ilə maraqlanan spikerə məlumat verilib ki, onun tezliklə sağalması üçün tibb personalı tərəfindən bütün lazımi tədbirlər görülür.

Milli Məclisin sədri qeyd edib ki, Prezident İlham Əliyev bununla bağlı müvafiq tapşırıqlarını verib və məsələ müvafiq dövlət qurumlarının diqqət mərkəzindədir. Spiker həmçinin dövlət başçısının Milli Məclisin deputatına qarşı xain terror aktını törətmiş şəxsin və ya şəxslərin müəyyən edilərək cinayət məsuliyyətinə cəlb olunması istiqamətində təxirəsalınmaz əməliyyat-istintaq tədbirlərinin aparılması ilə bağlı hüquq-mühafizə orqanlarına göstəriş verdiyini xatırladıb. Bildirilib ki, bu terroru törədənlər öz məqsədlərinə nail ola bilməyəcəklər.