Şamaxıda “Yay Fest 2026” həyəcanı | İştirakçılar yeni bilik və təcrübə qazanırlar - Baku TV

“Yay Fest 2026” çərçivəsində gənclərin media və rəqəmsal bacarıqlarının inkişafına həsr olunan növbəti düşərgə Şamaxıda təşkil edilib.

2019-cu ildən keçirilən festival artıq altıncı dəfədir gəncləri bir araya gətirir. Beş gün davam edən düşərgədə iştirakçılar müxtəlif təlimlərə, ekspert çıxışlarına və panel müzakirələrinə qatılır, eyni zamanda asudə vaxtlarını səmərəli keçirirlər.

Gənclər Fondunun şöbə müdiri Nail Şükürov bildirib ki, “Yay Fest” ölkənin ən böyük gənclər festivallarından biridir və hər il aktual mövzuya həsr olunur:

“Bu il Prezident İlham Əliyevin təsdiqlədiyi süni intellekt üzrə milli strategiyanın prioritetlərini nəzərə alaraq festivalın əsas mövzusunu süni intellekt və rəqəmsal inkişaf olaraq müəyyən etmişik”.

Onun sözlərinə görə, festival çərçivəsində ümumilikdə səkkiz düşərgə keçiriləcək. Hər düşərgədə 250 gəncin iştirakı nəzərdə tutulur:

“Ümumilikdə 2 mindən çox gənc “Yay Fest”dən faydalanacaq. Düşərgələrdə panel müzakirələri, təlim sessiyaları təşkil ediləcək. Gənclər burada yeni bilik və bacarıqlar qazanacaq, həmyaşıdları ilə əlaqələr quracaq və asudə vaxtlarını səmərəli keçirəcəklər”.

Nail Şükürov qeyd edib ki, festival ərazisində iştirakçıların qalması, istirahəti, təlimlərə və əyləncə proqramlarına qatılması üçün bütün şərait yaradılıb.

“İlk düşərgə rəqəmsal dövlət mövzusuna həsr olunmuşdu. Hazırkı düşərgənin mövzusu isə media və rəqəmsal savadlılıqdır. Məqsədimiz gənclərin əylənərək öyrənməsidir. Bunun üçün qeyri-formal təhsil metodlarından istifadə edirik və illərin təcrübəsi göstərir ki, bu yanaşma öz bəhrəsini verir”, – deyə o vurğulayıb.