Şarl Mişel İlham Əliyevə zəng etdi
Avropa İttifaqı Şurasının Prezidenti Şarl Mişel martın 25-də Prezident İlham Əliyevə zəng edib.
Telefon danışığı zamanı 2021-ci il dekabrın 14-dən 2022-ci il avqustun 31-dək olan dövr ərzində üçtərəfli formatda keçirilən görüşlərdə müzakirə edilən müxtəlif məsələlərə toxunulub. Avropa İttifaqının regionda davamlı sülhün və təhlükəsizliyin təmin olunması üçün səylərini bundan sonra da davam etdirəcəyini deyən Şarl Mişel Laçın-Xankəndi yolu ətrafındakı məsələlərə də toxunub və son günlər baş verən insidentlərlə bağlı narahatlığını ifadə edib.
İlham Əliyev isə qeyd edib ki, sözügedən yolun guya bağlı olması ilə bağlı Ermənistanın irəli sürdüyü iddialar tamamilə yalandır. Belə ki, 2022-ci il dekabrın 12-dən bugünədək 5 minə yaxın nəqliyyat vasitəsi, tibbi yardıma ehtiyacı olan şəxs və onları müşayiət edənlər Laçın yolundan keçiblər.
Dövlət başçısı Rusiya sülhməramlı qüvvələrinin müvəqqəti yerləşdirildiyi Azərbaycan ərazilərinə Ermənistan tərəfindən silah-sursat və şəxsi heyət daşınması prosesinin hələ də həyata keçirildiyini bildirib. İ.Əliyev Ermənistan rəhbərliyinin təhlükəli və eskalasiyaya yönəlmiş rəsmi açıqlamalarına diqqət çəkib.
Qeyd edib ki, 2023-cü il martın 20-də Avropa İttifaqı missiyasının yerləşdiyi Ermənistan-Azərbaycan dövlət sərhədi istiqamətində Ermənistanın növbəti təxribatı zamanı Dövlət Sərhəd Xidmətinin hərbi qulluqçusu yaralanıb və martın 5-də Azərbaycanın Qarabağ bölgəsində qeyri-qanuni erməni hərbi birləşmələrinin törətdikləri təxribat zamanı 2 hərbi qulluqçumuz şəhid olub.
Dövlət başçısı vurğulayıb ki, bütün bunlar Ermənistanın apardığı təhlükəli siyasətin nəticəsidir.