Şəhid Elnur Səmədova həsr edilən sənədli filmin təqdimatı olub

İsmayıllıda şəhid Elnur Səmədovun xatirəsinə həsr edilən “Nur üzlü şəhidim” sənədli filminin təqdimatı keçirilib.

Təqdimat mərasimində rayon icra hakimiyətinin başçısı Nahid Bağırov, idarə, təşkilat rəhbərləri, şəhid ailələri, müharibə iştirakçıları iştirak ediblər. Əvvəlcə şəhidin həyat və döyüş yolunu əks etdirən sərgiyə baxış keçirilib. Daha sonra sənədli film nümayiş olunub.

Şəhid Elnur Səmədovun anası övladına göstərilən diqqətə görə hər kəsə təşəkkür edib. “Filmdən çox razı qaldım. Elnura məhz belə filmlər yaraşır”, - deyə Sənubər Səmədova qeyd edib.

N.Bağırov Elnur Səmədovun timsalında Azərbaycan hərbçilərinin döyüşlərdə göstərdikləri qəhrəmanlıqlardan, Prezident İlham Əliyevin və Birinci vitse-prezident Mehriban Əliyevanın şəhid ailələrinə və qazilərə göstərdiyi diqqət və qayğıdan danışıb.

Rayon rəhbəri filmin ərsəyə gəlməsində əməyi olan hər kəsə öz minnətdarlığını bildirib. Daha sonra müğənnilərin və şagirdlərin ifasında hərbi-vətənpərvərlik mövzusunda mahnı və şeirlər səsləndirilib.