Səhv bilinən məlumatlar | Soyuqdəymə vaxtı nələri etmək olmaz?

Soyuqdəymə soyuq mövsümdə insanlara yoldaşlıq edir.

Bəs xəstələnən zaman nələri etmək olar, nələri yox?

Rusiyalı allerqoloq-immunoloq Aleksandr Andreyev özünün "Telegram" kanalında bununla bağlı tövsiyələrini bölüşüb.

Həkimin sözlərinə görə, termometrin göstəricisi 38,5 Selsidən yuxarı qalxıbsa, bürünmək qəti tövsiyə edilmir. Əksinə, bədənin soyuması üçün şərait yaratmaq lazımdır. Əlavə olaraq xəstəni nəm salfetlə və ya dəsmalla silmək olar.

O bildirib ki, əks göstəriş olmadıqda hərarəti salan dərman qəbul etmək tövsiyə edilir. Yeri gəlmişkən, həkimlər qızdırmanın ilk əlamətlərində – temperatur 37 dərəcəni keçən kimi dərman içməyi tövsiyə etmirlər.

Həkimin sözlərinə görə, xəstənin olduğu otağın müntəzəm havalandırılması həmin yeri oksigenlə zənginləşdirir. Bu, zəifləmiş orqanizmdə virus yükünü azaldır və ətrafındakıları yoluxdurmamağa kömək edir, ancaq bəzi qaydalara əməl etmək lazımdır.

Belə olanda xəstənin başqa otağa keçməsi və otaqda temperaturun həddindən artıq aşağı düşməməsi vacibdir. Açıq havada 15-20 dəqiqəlik gəzinti də məsləhətdir. Bununla belə, həkim xəbərdarlıq edib ki, əgər soyuqdəymə yüksək hərarət, güclü öskürək, başağrısı, ümumi zəifliklə müşayiət olunursa, gəzinti əks göstərişdir.

Soyuqdəymə zamanı başı yumaq olar?

Soyuqdəymə zamanı hərarət yoxdursa və özünüzü yaxşı hiss edirsinizsə, başı yumaq olar. Ancaq bundan sonra isti geyinmək lazımdır. Xəstəlik hərarətsiz keçirsə, qısamüddətli isti duş qəbul etməyə də icazə verilir.