Şəki sakinləri ayağa qalxdı | Təhsil ocağının bağlanacağı xəbəri narazılığa səbəb oldu - Baku TV

Şəkinin Daşbulaq kənd məktəbinin bağlanması haqqında yayılan xəbərlər valideynlərin və müəllimlərin narazılığına səbəb olub.

Qeyd edək ki, 2023-cü ildə kənddə 80 yerlik modul tipli məktəb binası inşa edilib və hazırda bu təhsil ocağında 29 şagird təhsil alır.

Məktəbin müəllimi Yusif Qarayev yaranan vəziyyətlə bağlı narahatlığını ifadə edib:

“Kəndin uşaq bağçası, bu yaxınlarda isə kitabxanası bağlanıb. Bu, kənddəki sonuncu mədəniyyət ocağıdır. Əgər bunu da bağlasalar, deməli, kəndin dağılmasını sürətləndirirlər. 40 ildir bu məktəbdə müəllim işləyirəm. Hər cür şəraiti olan gözəl modul tipli təhsil ocağı inşa ediblər. Ancaq bir neçə gündür məktəbin bağlanacağı ilə bağlı bizə bildiriş gəlib, əmək müqaviləmizə xitam verildiyi bildirilib. Əhali və şagirdlərimiz üçün çox təəssüf edirik, onların taleyi bizi düşündürməlidir”.

Məsələ ilə bağlı Şəki-Zaqatala Regional Təhsil İdarəsindən bildirilib ki, Şəki rayonunun Daşbulaq kənd ümumi orta məktəbinin bağlanması ilə bağlı yayılan məlumatlar həqiqəti əks etdirmir:

“2026-2027-ci tədris ilindən etibarən həmin təhsil müəssisəsində yüksəkixtisaslı müəllim təminatında çətinlik müşahidə olunan bəzi fənlər üzrə tədrisin onlayn formatda müəllimlərin sertifikatlaşdırılması prosesində yüksək nəticə göstərmiş ixtisaslı pedaqoqlar tərəfindən təşkili nəzərdə tutulur. Bu dəyişiklik təhsil müəssisəsinin fəaliyyətinə təsir göstərmir. Məktəbin pedaqoji və texniki heyətinin əmək münasibətlərində hər hansı ixtisar nəzərdə tutulmur”.