“Semaşko”da ölüm ayağındakı xəstəyə qarşı özbaşınalıq?

Bakıda yerləşən Kliniki Tibbi Mərkəzdə xəstə yaxınları ilə tibbi heyət arasında gərginlik yaşanıb.

Bu barədə görüntülər sosial şəbəkələrdə yayılıb və ciddi narazılıqla qarşılanıb. İddia olunur ki, xəstəxanada xəstəyə qarşı özbaşınalıq edilib.

Məsələyə Kliniki Tibbi Mərkəzdən də münasibət bildirilib və qeyd edilib ki, 2000-ci il təvəllüdlü Səbinə Məmmədova adlı pasiyent yanvarın 8-i saat 10:00-da isterik vəziyyətdə Mərkəzin Təcili və Təxirəsalınmaz Tibbi Yardım şöbəsinə gətirilib.

Müayinə edildikdən sonra onun 9 həftəlik hamilə olduğu müəyyən edilib. Yaxınları qanaxma olduğunu əsas gətirərək prosesin sakit şəkildə aparılmasına müdaxilə etməyə çalışıblar.

Müayinələrdən sonra bətndəki dölün vəziyyətində hər hansı neqativ halın olmadığı dəqiqləşdirilib. Lakin xəstə yaxınları onun qan qusduğunu və hamiləliyin pozulacağını bildirdikləri üçün həkimlər tərəfindən həkim-cərrahın baxışı məsləhət görülüb.

Xəstə yaxınları bu prosesə də mane olaraq damardaxili infuziya tələb ediblər. Cərrahın baxışından sonra xəstədə mədə qanaxmasının olmadığı üzə çıxıb və o, şöbəyə yatırılıb. Analizlər götürülüb, lazımi müayinələr aparılıb və xəstədə hər hansı patologiya aşkar edilməyib. Xəstədə evdə müşahidə olunan ürəkbulanma və qanqusmanın hamiləliyin gedişində rast gəlinən normal hallardan biri olduğu barədə yaxınlarına məlumat verilib.

Kliniki Tibbi Mərkəzin açıqlamasında o da qeyd edilib ki, həkimlərin fəaliyyətinə maneə törədən və digər xəstələr üçün də narahatlıq yaradan həmin şəxslərin davranışları barədə hüquq-mühafizə orqanlarına məlumat verilib.