Siçanlar nə üçün adi suya üstünlük verdi? | Tədqiqatçılardan maraqlı araşdırma

Kaliforniya Universitetində aparılan araşdırma stresin beyin dövrələrinə təsir edərək anhedoniyaya, yəni həzz alma qabiliyyətinin itməsinə səbəb olduğunu üzə çıxarıb.

Siçanlara adi və şəkərli su arasında seçim imkanı verilib. Adətən siçanlar şəkərli suya üstünlük verirlər. Lakin stresə məruz qalan bəzi siçanlar adi suya üstünlük verməyə başlayıblar. Tədqiqatçılar bu davranışı anhedoniyanın gəmiricilərdəki versiyası kimi qiymətləndiriblər.

Stresə davamlı siçanların amigdala və hipokampus arasındakı neyron əlaqələrinin güclü, anhedoniyaya həssas olan siçanlarda isə bu əlaqələrin zəifləmiş olduğu müəyyənləşdirilib.

Tədqiqatçılar hipokampus və amigdala arasındakı zəif əlaqəni bərpa etmək üçün siçanların beyninə neyronların tezliyini artıran xüsusi birləşmələr vurublar. Bu müdaxilədən sonra siçanlar yenidən şəkərli suya üstünlük verməyə başlayıblar və onların beyin fəaliyyəti stresə davamlı siçanların beyin fəaliyyəti ilə oxşar olub. Bu, stresin təsirlərini aradan qaldırmaq üçün beyin neyronlarının stimullaşdırılmasının mümkünlüyünü göstərir.

Anhedoniya depressiya, şizofreniya və parkinson kimi nevroloji və psixiatrik pozğunluqlarla əlaqələndirilir. Bu simptom ağır depressiya xəstələrinin təxminən 70 faizində müşahidə olunur.