Siyavuş Novruzov rayon rəhbərinə od püskürdü | Xalqın qarşısına çıxmağa üzü yoxdursa...

Milli Məclisin fevralın 3-də keçirilən iclasında komitə sədri Siyavuş Novruzov İmişli rayonunda baş verən məlum hadisədən bəhs edib.

O bildirib ki, heç kəs bilərəkdən kiminsə balasını öldürmək istəməzdi.

S.Novruzov ardınca deyib ki, məktəblilərin həlak olması ilə nəticələnən yol qəzasının baş verdiyi ərazi rayon mərkəzindən 3 kilometr aralıdadır:

“İcra başçısı, polis rəisi, niyə durub gəlmirsən ora? Sadəcə rayon prokuroru gedib. Bu gün hər kəs Prezidentə canını fəda etməyə hazırdır. Bizim hamımızın canı Prezidentə fədadır. Amma çıx camaatın qarşısına, onu başa sal! Niyə camaatdan kənara qaçırsınız?”.

Komitə sədri bildirib ki, hadisələr zamanı 18 nəfər həbs olunub, bəziləri əsəblərini cilovlaya bilməyib:

“Mən xahiş edərdim ki, onları da bağışlasınlar. Cavan uşaqlardır, qoy getsinlər ev-eşiklərinə. Amma belə hallarda rayon rəhbərləri, hüquq-mühafizə orqanlarının rəhbərliyi camaatın qarşısına çıxmalıdır. Əgər camaatın qarşısına çıxmağa üzləri yoxdursa, ərizələrini yazsınlar, çıxıb getsinlər evlərinə!”.