SOCAR Dübəndidə neft çirklənməsinin səbəbini açıqladı - Baku TV

Xəzər rayonu, Zirə qəsəbəsinin Dübəndi yaşayış sahəsi yaxınlığında Xəzər dənizinin sahilində neft qalıqlarının müşahidə olunması ilə bağlı yayılan görüntülərdən sonra əraziyə operativ şəkildə müdaxilə edilib.

Əraziyə Fövqəladə Hallar Nazirliyinin Mülki müdafiə qoşunlarının və Xəzər Hövzə Qəza-Xilasetmə Xidmətinin şəxsi heyəti, həmçinin xüsusi texnikalar cəlb olunub.

Hazırda sahildə təmizləmə işləri davam etdirilir.

Məsələ ilə bağlı SOCAR məlumat yayıb. Bildirilib ki, iyunun 19-da “Azneft” İstehsalat Birliyinin mərkəzi aparatının aidiyyəti xidmətlərinə Dübəndi çimərlik ərazisində neftlə çirklənmə izlərinin müşahidə olunması barədə məlumat daxil olub.

Qeyd olunub ki, Pirallahı adası ilə Dübəndi arasındakı akvatoriyada gəmilər və helikopter vasitəsilə aparılan ilkin baxış zamanı neft ləkəsi aşkar edilib. Hadisənin ilkin mərhələsində neftin aktiv çıxış nöqtəsi vizual olaraq müşahidə edilmədiyindən mümkün çirklənmə mənbələrinin bir neçə variantı nəzərdən keçirilib.

“Aparılan nəzarətli diaqnostik yoxlama nəticəsində çirklənmə mənbəyinin “Azneft” İstehsalat Birliyinə məxsus sualtı neft kəmərlərindən biri olduğu müəyyən edilib. Sızma mənbəyi müəyyənləşdirildikdən dərhal sonra həmin sualtı kəmər üzrə neftin nəqli dayandırılıb”, – məlumatda qeyd olunub.

SOCAR-ın açıqlamasına görə, insidentin idarə olunması məqsədilə “Azneft” İstehsalat Birliyi tərəfindən operativ qərargah yaradılıb və vəziyyət tam nəzarətə götürülüb.

Həmçinin bildirilib ki, dalğıc xidməti tərəfindən aparılan diaqnostik tədbirlər nəticəsində sualtı neft kəmərində mexaniki xarakterli zədələnmələr aşkarlanıb.

“İlkin qiymətləndirməyə əsasən, bu zədələnmələrin xarici predmetlə, ehtimal ki, lövbərlə təmas nəticəsində yarandığı müəyyən edilib. Zədələnmə aşkar edildikdən dərhal sonra təmir-bərpa işlərinə başlanılıb. Bu işlər başa çatana qədər zədələnmiş kəmər istismardan kənar saxlanılır ki, bu da dənizə neft sızmasının davam etməsinin qarşısını alır”, – açıqlamada vurğulanıb.

Məlumatda qeyd edilir ki, insidentin nəticələrinin aradan qaldırılması, o cümlədən dənizin və sahilyanı ərazilərin təmizlənməsi işləri Fövqəladə Hallar Nazirliyi və “Azneft” İstehsalat Birliyi tərəfindən sıx koordinasiya şəraitində həyata keçirilir.