Söyüdlüdəki yoxlamaların nəticələri açıqlandı

Sentyabrın 26-da Gədəbəyin Söyüdlü kəndində vəziyyətin araşdırılması üçün yaradılan Komissiyanın növbəti iclası keçirilib.

İclasda Söyüdlüdə fəaliyyət göstərən “Azərbaycan Beynəlxalq Mədən Şirkəti”nin mədən ərazisində ekoloji monitorinqin keçirilməsi, sağlamlıq, ətraf mühit və əməyin mühafizəsi üzrə qiymətləndirilmənin aparılması üçün dəvət olunan, Böyük Britaniyanın “Micon” International Co Limited Şirkətinin keçirdiyi monitorinqlərin nəticələri açıqlanıb.

Komissiyanın sədri, ekologiya və təbii sərvətlər naziri Muxtar Babayev bildirilib ki, ərazidən götürülən nümunələrin təhlillərinə əsasən, su obyektlərində bir sıra göstəricilərin normadan artıq olduğu aşkarlanıb. Lakin bunun ətraf mühit və insan sağlamlığı üçün təhlükə mənbəyi olmadığı müəyyənləşdirilib. İstehsal və yaşayış sahələrində yeraltı suların monitorinqi zamanı zavod ərazisindəki üç müşahidə quyusunun suyunda kiçik miqdarlarda sianidin olduğu qeydə alınıb.

Göstəricilər yol verilə bilən qatılıq həddindən dəfələrlə aşağı olsa da, bu fakt ətraf mühitə potensial risk kimi nəzərə alına bilər. Eyni zamanda istehsal sahəsi və ətraf ərazilərdən götürülən torpaq nümunələrində bir sıra göstəricilərin miqdarı həddindən çox olub. “Micon” şirkəti bunu regionun filizləşmə xüsusiyyətləri və tarixi mədənçiliyin mövcudluğu ilə əlaqələndirib.

Qeyd olunub ki, “Azərbaycan Beynəlxalq Mədən Şirkəti” qarşısında insan sağlamlığına, texnogen təhlükəsizliyə, istehsalatın modernləşdirilməsinə aid bir sıra tələblər qoyulub, tövsiyələr verilib. Şirkət tərəfindən yenidənqurma, modernləşdirilmə ilə bağlı icra qrafiki hazırlanaraq təqdim olunduqdan və aidiyyəti dövlət qurumları ilə razılaşdırıldıqdan sonra zavodun fəaliyyətinin mərhələli şəkildə bərpa olunması təmin edilə bilər.