Su xətti çəkildi, yollarımız xaraba qaldı | Binəqədi sakinlərinin yol problemi

Binəqədi rayonu, Binəqədi qəsəbəsi, Mikayıl Ələkbərov küçəsinin yolları bərbad vəziyyətdədir.

Ötən il aidiyyəti qurum əraziyə su çəkmək üçün asfalt yolu dağıdıb və bir daha bərpa etməyib.

Vətəndaşlar məcbur olub avtomobillərin hərəkət edə bilməsi üçün əraziyə öz hesablarına çınqıl töküblər.

“Bura məktəb yoludur, bir az yağış yağandan sonra daha da pis günə düşür. Özümüz torpaq tökmüşük ki, asfalt çökməsin. Maşınla getmək olmur, qeyri-mümkündür. Gündə ustada olursan. Qışda, ümumiyyətlə, buradan getmək olmur, hamı ayağında “salafan paket”lə gedir”, – sakin narazılığını bildirib.

Məsələ ilə bağlı Azərbaycan Dövlət Su Ehtiyatları Agentliyi İri Şəhərlərin Birləşmiş Su Təchizatı Xidmətindən bildirilib ki, Binəqədi qəsəbəsindəki Cəfər Cabbarlı və Mikayıl Ələkbərov küçələrində yeni su xətləri çəkilərək istismara verilib. Görülən işlər zamanı sökülən 2000 kvadratmetr asfalt örtüyünün bir hissəsi çəkilib, qalan hissədə də problem aradan qaldırılcaq.