Sürücülərin diqqətinə: etibarnamə tələbi ləğv oluna bilər

Azərbaycanda avtomobilləri etibarnaməsiz də idarə etmək mümkün ola bilər.

Konstitusiya Məhkəməsi bununla bağlı müvafiq qərar qəbul edib.

Sənədə əsasən, nəqliyyat vasitəsinin mülkiyyətçisi olmayan şəxsin avtomobili sürməsi üçün etibarnamənin zəruriliyi tələbinin qanunvericilikdə aradan qaldırılması Milli Məclisə tövsiyə olunub.

Vəkil Hikmət Əliyev bu dəyişikliyi müasir dövrün standartlarına uyğun hesab edir: “Bir çox dövlətlərdə artıq nəqliyyat vasitələrinin idarə edilməsi üçün etibarnamə institutu aradan qalxıb. Misal üçün, Rusiya Federasiyasında 2012-ci ildən etibarən bu tələb aradan qaldırılıb. Rusiyada başqasının avtomobilini idarə etmək üçün sürücü “Osada” siyasətinə daxil edilməlidir. “Osada” siyasəti avtomobil və digər nəqliyyat vasitəsini idarə etmək üçün sürücülük vəsiqəsidir. Sürücünün bu quruma üzv olması artıq onun etibarnaməsiz avtomobili idarə edə bilməsi imkanını yaradır.

Bundan başqa, Türkiyə, Belarus, Polşa kimi ölkələrdə eyni siyasəti görmək mümkündür. Bu ölkələrdə nəqliyyat vasitəsinin texniki sənədi və sürücülük vəsiqəsinin olması avtomobili idarə etmək üçün kifayət edir”.

Qeyd edək ki, hazırda nəqliyyat vasitəsinin sahibi avtomobildə olmadığı hallarda onun etibarnaməsiz idarə edilməsinə görə 40 manat cərimə edilir.