Şuşa – sərhədlərə sığmayan şəhərin həqiqətləri | İllərin yarası necə sağaldı?

“Gör nələri qaytarmışıq” verilişinin yeni buraxılışı mədəniyyətimizin beşiyi hesab olunan Şuşaya həsr olunub.

XVIII əsrdə Qarabağ xanı Pənahəli xan tərəfindən sıldırım qayalar üzərində salınan Şuşa əvvəlcə qala, sonradan isə xanlığın paytaxtı oldu. Zamanla məktəb, akademiya və böyük mədəniyyət mərkəzinə çevrilən bu şəhərin küçələrində sanki musiqi nəfəs alırdı. Muğamın bir həyat tərzi kimi yaşandığı Şuşa "Qafqazın konservatoriyası" adını qazanmışdı.

1992-ci ilin mayında Şuşa mühasirədə idi. Azərbaycan ağır siyasi böhran yaşayırdı və orduda vahid komandanlıq yox idi. Dövlət özünün ən çətin günlərindən keçirdi və mayın 8-də Şuşa işğal edilərək tariximizin ən böyük yaralarından birinə çevrildi.

Şuşanın əsl tarixi ədaləti 2020-ci il sentyabrın 27-də başlayan 44 günlük Vətən müharibəsində qazanıldı. Azərbaycan əsgərlərinin yalın əllə sıldırım qayaları aşaraq düşmənlə əlbəyaxa döyüşə girməsi ilə Şuşaya gedən yol müxtəlif ölkələrin döyüş ədəbiyyatına salınan böyük bir tarixə çevrildi.

2020-ci il noyabrın 8-də Şuşanın azad edilməsi ilə Azərbaycan son 100 ilin ən böyük müjdəsini aldı. Bu tarixi xəbər yalnız bir şəhərin qurtuluşu deyil, həm də milli qürurumuzun geri qayıtması idi.

Bu gün Şuşada binalarla bərabər həm də şəhərin ruhu bərpa olunur. Şuşanın tarix boyu oynadığı rolun təsdiqi olaraq şəhər 2021-ci ildə Azərbaycanın, 2023-cü ildə isə Türk dünyasının mədəniyyət paytaxtı elan edilib.