Tatusu olanlar bunları bilsin | Gözlənilməz təsiri açıqlandı

Tatu boyaları təkcə dəridə qalmaya bilər: piqmentin bir hissəsi limfa damarları ilə hərəkət edərək yaxınlıqdakı limfa düyünlərində toplanır.

Bunu PNAS-da dərc olunmuş, siçanlar üzərində aparılan tədqiqat göstərib: limfa düyünlərində piqmentləri immun hüceyrələri udur, bu hüceyrələrin bir hissəsi məhv olur və iltihabi reaksiya iki aya qədər davam edir.

Müəlliflər prosesi tatu vurulduqdan sonra ilk dəqiqə və saatlarda izləyiblər: boyalar sürətlə limfa düyünlərinə düşür və adətən limfanın süzüldüyü zonalarda toplanır. Zaman keçdikcə düyünlərdəki piqmentin miqdarı azalmır, bəzi hallarda isə hətta artır ki, bu da hissəciklərin tatu edilmiş dəridən uzunmüddətli “axınına” işarə edir.

Tədqiqatçılar ayrıca olaraq, peyvənd vurulması tatu sahəsinə düşdükdə bunun təsirini də yoxlayıblar.

Təcrübələrdə cavab peyvəndin növündən asılı olub:

COVID-19-a qarşı mRNT peyvəndindən sonra anticisimlərin yaranması azalırdı, UV-inaktivləşdirilmiş qrip peyvəndindən sonra isə əksinə, arta bilirdi – ehtimal ki, peyvəndlərin işləmə mexanizmlərinin fərqli olması və yerli iltihabın rolu ilə bağlıdır.

Müəlliflər vurğulayırlar ki, nəticələr heyvanlar üzərində əldə edilib və onları birbaşa insanlara tətbiq etmək olmaz. Ancaq bu nəticələr göstərir ki, tatu yalnız lokal prosedur deyil və limfa düyünlərində immun sisteminin işini dəyişə bilər. Buna görə də boyaların immun cavaba təsiri daha yaxşı öyrənilənədək, peyvəndlərin birbaşa tatu edilmiş nahiyəyə vurulmaması tövsiyə edilir.