Teymur Musayev təyyarə qəzasında həlak olanlar və yaralananlardan danışdı

“AZAL-ın Bakı-Qroznı reysini yerinə yetirən təyyarənin Aktau şəhəri yaxınlığında dekabrın 25-də qəzaya uğraması nəticəsində xəsarət alan və ötən gün Bakıya gətirilən yaralıların ilkin müayinələri aparılıb, vəziyyətləri qənaətbəxşdir”.

Bunu səhiyyə naziri Teymur Musayev "Yeni Klinika"da müalicəsi davam edən yaralıların son vəziyyəti barədə jurnalistlərə açıqlamasında deyib.

Onun sözlərinə görə, Qazaxıstanda müalicəsi davam edən 3 nəfərin vəziyyəti orta ağırdır: “Həmin şəxslərin müalicəsi daim nəzarət altındadır. Bakıdan oraya həkim və tibb bacısı qrupu göndəriləcək”.

Nazir qeyd edib ki, araşdırmalar yekunlaşdıqdan sonra nəşlərin Azərbaycana gətirilməsi həyata keçiriləcək.

“Aviaqəzada şəxsiyyəti müəyyənləşdirilməyənlərlə bağlı DNT analizləri götürülüb”, – deyə o bildirib.

T.Musayev həmçinin yaralıların hansı səbəbdən xəsarət aldıqlarının hələ ki məlum olmadığını vurğulayıb: “Onların qəlpə, yaxud güllə yarasından xəsarət aldıqları barədə konkret bir şey deyə bilmirik. Çünki bu, başqa araşdırma mövzusudur”.