Tullantılardan özünün nağıl aləmini yaradıb

Salyan sakini 78 yaşlı Adil Kazımovun yaşadığı bu məkana daxil olanda qarşında sanki kiçik bir şəhər mənzərəsi açılır. Burada tikililər üzərindəki mozaik bəzəklərlə diqqəti cəlb edir və həyət boyu müxtəlif əl işlərini seyr edərək irəliləyirsən.

Ömrünün 50 ildən çoxunu sürücü kimi çalışan Adil kişi günlərin birində bu peşə ilə vidalaşır. Heç kimin istifadə etmədiyi, gərəksiz bildiyi tikinti tullantılarından divarlarda bir-birindən maraqlı, rəngarəng kompozisiyalar ərsəyə gətirib. Beləcə özünün nağıllar aləmini yaradıb.

Evin fasadını, hasarları kafellə bəzəməklə yanaşı, həyətdəki yarımtikililəri də öz nağıl dünyasına daxil edən Adil kişi düzdüyü naxışlarla kompozisiyaları tamamlayır. Onun şam ağacının qozalarından düzəltdiyi rəngarəng quşlar, çilçıraqlar və bəzək əşyaları şəxsi fantaziyasının məhsuludur.