Türkiyə Müdafiə Nazirliyi məlumat yaydı: Qardaş ölkələrin birgə təlimi keçiriləcək

Türkiyə Müdafiə Nazirliyi respublikanın yaranmasının yüz illiyi münasibətilə Azərbaycanda keçiriləcək “Mustafa Kamal Atatürk 2023” təliminin 23 oktyabr tarixində başlayacağını açıqlayıb.

Bununla bağlı nazirliyin “X” sosial şəbəkəsindəki hesabında bildirilib. “Türkiyə və Azərbaycan quru qoşunları arasında dostluq, əməkdaşlıq və qarşılıqlı fəaliyyətin gücləndirilməsi, bilik və təcrübə mübadiləsi məqsədilə həyata keçiriləcək “Mustafa Kamal Atatürk 2023” təlimi və müştərək əməliyyatlar həyata keçirmə qabiliyyətinin artırılmasına 23 oktyabr tarixindən start verilir. Təlimdə xidmət göstərəcək F-16 təyyarələrimiz Azərbaycana gəlib”, – nazirliyin sosial media hesabındakı açıqlamada bildirilib.

Xatırladaq ki, Azərbaycanın Müdafiə Nazirliyi iki ölkənin Hərbi Hava Qüvvələrinin "Mustafa Kamal Atatürk - 2023" birgə taktiki təliminə cəlb edilən aviasiya vasitələri ilə məşqlərin keçirildiyini bildirib.

Oktyabrın 23-dən 25-dək keçiriləcək təlimə hər iki qardaş ölkənin müxtəlif qoşun növündən xeyli sayda texnika, artilleriya və aviasiya vasitələri, eləcə də mühəndis texnikası və kiçik botlar cəlb olunub.