Ukraynada savaşın görünməyən qəhrəmanı Ruslan Abbasov | 18 mindən çox meyiti...

“DNT bazası üzrə Ali Radada qəbul olunan qanun layihəsini mən hazırlayıb göndərmişəm. 2022-ci ildə müharibə başlayandan sonra bizim işimiz daha da artdı, məsuliyyət çoxaldı”.

Bunu Ukrayna Daxili İşlər Nazirliyinin Dövlət Ekspertiza-Kriminalistik Mərkəzinin direktor müavini, ekspertiza xidmətinin rəhbəri Ruslan Abbasov Baku TV-yə müsahibəsində deyib.

O, Rusiya-Ukrayna savaşı və gördüyü işlə bağlı başqa faktları da açıqlayıb:

“Konkret işimiz meyitlərin və yaxud meyit parçalarının şəxsiyyətinin DNT üzrə müəyyənləşdirilməsidir. Ədliyyə Nazirliyi, Səhiyyə Nazirliyi və bütün hüquq-mühafizə orqanları həm tanınmayan cəsədlərin, həm də yaxın qohumlarının DNT profilini bizə göndərir. Müharibə dövründə də müraciətlər kütləvi haldadır. Əsas vəzifəmiz müharibə ilə bağlı cinayətlərin sənədləşdirilməsidir. Rusiya-Ukrayna savaşında tanınmayan hala düşən cəsədlərin identifikasiyası ilə də məşğuluq. Yəni, təkcə DNT ekspertizaları aparmırıq. Xidmətimiz 77-dən çox məhkəmə ekspertizası növünü təmin edir”.

Onun sözlərinə görə, ekspertiza xidmtinə əsasən Xarkov, Xerson, Luqansk və Donetsk istiqamətlərində ölən insanların meyitləri daxil olur. Çünki gərgin döyüşlər həmin ərazidə gedir.

“18 mindən çox tanınmayan cəsədi DNT metodu ilə araşdırmışam. 10 mindən çoxunun artıq uyğunluğu var, yəni şəxsiyyəti müəyyən edilib. İşimiz psixoloji olaraq da çox çətindir. Çünki insanların tanınmaz halda ölən yaxınlarını bədən hissəsi ilə tutuşdurub, müəyyən edib onlara sübut etmək hədsiz məsuliyyət tələb edir. Bu işdə inamsızlıq, anlaşılmazlıq fəsadlara səbəb ola bilər. Biz də buna yol verməməliyik”, – deyə R.Abbasov bildirib.