Ulu Öndərin 100 illik yubileyinə həsr olunan konfrans keçirildi

Bakıda Nazirlər Kabinetinin təşkilatçılığı ilə “Heydər Əliyev və Azərbaycanda müstəqil dövlət quruculuğu: sosial-iqtisadi keçidin tarixi və müasirliyi” mövzusunda konfrans keçirilib. Toplantıda Baş nazir Əli Əsədov, hökumət nümayəndələri və deputatları iştirak ediblər.

Tədbirdə çıxış edən Baş nazir ümummilli liderin müstəqil Azərbaycan dövlətinin qurulmasında göstərdiyi misilsiz xidmətlərdən söz açıb və bildirib ki, müasir Azərbaycan tarixi dünyanın siyasət arenasında xüsusi yer tutmuş görkəmli dövlət xadimi, siyasi lider və şəxsiyyət Heydər Əliyevin adı ilə bağlıdır. Dövlətimizin bugünkü inkişaf yolu ötən əsrin 70-ci illərindən, Heydər Əliyevin həm Azərbaycanda, həm də SSRİ-də rəhbər vəzifələr tutduğu illərdən başlayır.

O da qeyd edilib ki, 1969-cu il iyulun 14-də Heydər Əliyevin respublikanın rəhbəri vəzifəsinə seçilməsi ilə Azərbaycan yeni dövrə qədəm qoyub. Tədbirdə digər çıxışçılar da ulu öndərin həyat və fəaliyyəti ətrafında konfrans iştirakçıları ilə fikirlərini bölüşüblər.

Tədbirin sonunda Heydər Əliyevin 100 illiyinə həsr olunan “Mən Azərbaycana lazım idim” adlı film nümayiş etdirilib.