Uyuşma və keyimə niyə yaranır? | Ciddi xəstəliklərdən qorunmaq üçün...

Hərəkət və ya məşq edərkən qollarda, eləcə də ayaqlarda yaranan ağrı periferik arteriya xəstəliyinin əlaməti ola bilər.

Bu həmçinin əzələ zəifliyi, saç tökülməsi, dəridə soyuqluq, xoralar və ayaq barmaqlarının uyuşması ilə də müşayiət oluna bilər.

Periferik arteriya xəstəliyi əksər hallarda aşağı ətrafların arteriya və damarların daralması ilə müşayiət olunan iltihabi xəstəliklər qrupudur.

Adıçəkilən xəstəlik xolesterol və digər yağlar damarlarda yığılıb oradakı qan axınının qarşısını alanda baş verir. Xəstəlik piylənmə, şəkər xəstəliyi, siqaret çəkməklə əlaqəlidir və çox ağrılı ola bilir.

Bundan əlavə, diaqnozdan sonra beş il ərzində miokard infarktı riski artır, çünki həm koronar, həm də karotid arteriyalar patoloji prosesdə iştirak edir.

Düzgün qidalanma, pis vərdişlərdən imtina, sağlam çəki saxlamaq, qan təzyiqinə nəzarət etmək və şəkərli diabetin vaxtında müalicəsi belə patologiyanın yaranma riskini azalda bilər. Xəstəliyin ən effektiv müalicə yollarından biri isə hərəkət etməkdir.