Vəfat edən şəxsin pensiyasını almaq üçün hansı şərtləri bilməlisiniz? - Baku TV

Rəsmi statistikaya görə, Azərbaycanda 2024-cü ildə vəfat edən şəxslərin 40 faizinin yaşı 65-dən az olub. Qeyd olunan dövrdə dünyasını dəyişən kişilərin 47 faizi pensiya yaşına çatmayıb. Bu vəziyyət bir məsələni aktuallaşdırır.

Bəs ölən şəxslərin pensiya kapitalından kimlər yararlana bilir?

Hüquq müdafiəçisi Sahib Məmmədov bildirir ki, ər və arvaddan biri vəfat etdikdə digər tərəf onun əmək pensiyasını almaq hüququna malikdir:

“Məsələn, kişinin əmək pensiyası qadınınkından yüksəkdirsə, o, müraciət edərək ərinin təqaüdünü ala bilər”.

Hüquqşünas Vüsal Cəfərov isə qeyd edir ki, hazırda qanunvericilikdə vəfat etmiş şəxsin pensiya kapitalının birdəfəlik şəkildə onun vərəsələrinə verilməsi ilə bağlı hər hansı bir tənzimləmə mövcud deyil.

Ekspertlər bildirirlər ki, digər hallarda vəfat edən şəxsin pensiya kapitalı həmrəylik prinsipi əsasında xərclənir. Yəni fərdi uçot əsasında toplanmasına baxmayaraq, yığılan vəsait digər şəxslərin pensiyalarının ödənilməsinə yönəldilir.