Vəkil Xalq artisti üçün məhkəmədən nə tələb etdi? | Elə şeylər açıqlandı ki…

Xalq artisi Ağadadaş Ağayevlə “Medera Hospital”ın mühafizəçisi Nurəddin Cəlilovun insidenti ilə bağlı cinayət işinin ilk məhkəmə hazırlıq iclası keçirilib.

Binəqədi Rayon Məhkəməsinin hakimi Vüsal Tağıyevin sədrliyi ilə keçirilən iclasda tərəflərdən biri – Nurəddin Cəlilov iştirak etsə də, qarşı tərəf – təqsirləndirilən Ağadadaş Ağayev prosesə gəlməyib.

Onun üzrlü səbəbdən prosesdə iştirak etməməsi ilə bağlı məhkəmənin elektron sisteminə teleqram daxil olub. Buna görə də Ağadadaş Ağayevin vəkili prosesin təxirə salınması ilə bağlı vəsatət təqdim edib.

Cinayət işi üzrə zərərçəkən qismində iştirak edən hospitalın əməkdaşı Nəzakət Paşayevanın vəkili Gülşən Salmanova isə Xalq artistinin prosesdə iştirak etməməsinə görə onun barəsində seçilən qətimkan tədbirinin həbslə əvəz edilməsi ilə bağlı vəsatət təqdim edib.

Məhkəmə qısa müşavirədən sonra vəsatəti əsassız sayaraq onun barəsində seçilən polisin nəzarəti altında qətimkan tədbirinin qüvvədə saxlanılması haqda qərarı açıqlayıb. Növbəti proses noyabrın 14-nə təyin olunub.

Qeyd edək ki, hadisə 2024-cü ilin iyulunda baş verib. Ağadadaş Ağayev mübahisə etdiyi Nurəddin Cəlilova balta atıb. Mühafizəçi Nurəddin Cəlilov isə Xalq artistini döyüb. Balta isə klinikada çalışan qadın Nəzakət Paşayevaya dəyib və o, xəsarət alıb.

Təqsirləndirilən şəxsə Cinayət Məcəlləsinin müvafiq maddəsi ilə ittiham verilib. Bu maddənin sanksiyasında 2 ildən 5 ilə qədər həbs cəzası nəzərdə tutulur.