Prokuror Ağadadaş Ağayevlə bağlı cəza istədi | Məhkəmə istintaqı başa çatdı

Xalq artisti Ağadadaş Ağayevin cinayət işi üzrə məhkəmə prosesi keçirilib. Binəqədi Rayon Məhkəməsində hakim Vüsal Tağıyevin sədrliyi ilə baş tutan prosesdə məhkəmə istintaqı başa çatıb.

Prokuror çıxışında Ağadadaş Ağayevin xuliqanlıqda təqsirli bilinərək 2 il azadlıqdan məhrum edilməsini, Cinayət Məcəlləsinin 70-ci (şərti məhkumetmə) maddəsi tətbiq edilməklə həmin cəzanın şərti hesab olunmasını istəyib.

Ağadadaş Ağayevin vəkili Asim Abbasov müdafiə çıxışı üçün vaxt istəyib.

Həmçinin hakim Elçin Ağayevin sədrliyi ilə keçirilən digər prosesdə dövlət ittihamçısı Xalq artisti ilə mübahisə edən hospitalın mühafizəçisi Nurəddin Cəlilovun isə 2 il 6 ay azadlıqdan məhrum edilməsini, Cinayət Məcəlləsinin 70-ci (şərti məhkumetmə) maddəsi tətbiq edilməklə onun cəzasının da şərti hesab olunmasını istəyib.

Müdafiə tərəfi çıxış üçün vaxt istəyib. Növbəti məhkəmə prosesi martın 6-na təyin olunub.

Qeyd edək ki, sözügedən məsələ ilə bağlı tərəflər barışıblar. Həmçinin Ağadadaş Ağayevin hospitala, eləcə də hospitalın Xalq artistinə qarşı qaldırdığı mülki iddiaya da xitam verilib. Lakin həm Ağadadaş Ağayevin, həm də Nurəddin Cəlilovun barəsində açılan cinayət işləri üzrə məhkəmə prosesləri davam edir.