Xalq artistinin məhkəmə prosesinə gəlməmə səbəbi | Şahidlər nələri etiraf etdi?

Xalq artisti Ağadadaş Ağayevə qarşı xuliqanlıqda ittiham olunan hospitalın mühafizəçisi Nurəddin Cəlilovun cinayət işi üzrə məhkəmə prosesi davam etdirilib.

Binəqədi Rayon Məhkəməsində hakim Elçin Ağayevin sədrliyi ilə keçirilən prosesdə Ağadadaş Ağayevin səhhəti ilə əlaqədar prosesdə iştirak edə bilmədiyi elan olunub.

Prosesdə şahid qismində Binəqədi Rayon Mənzil-Kommunal İstismar Sahəsinin işçisi Validə Cabbarova, hospitalın xəzinədarı vəzifəsində çalışan Güldəstə Aşurlu və xadimə Xuraman Abbasova dindirilib.

Şahid qismində çıxış edən Xuraman Abbasova bildirib ki, hadisə baş verən gün işdə olub. Həmin gün Ağadadaş Ağayevin əlində balta nalayiq ifadələr işlədə-işlədə xəstəxanaya yaxınlaşdığını görüb.

Onun sözlərinə görə, Xalq artistinin atdığı baltanın iş yoldaşı Nəzakət xanıma dəydiyinin şahidi olub. Prosesdə şahid qismində dindirilən hospitalın xəzinədarı Güldəstə Aşurlu bildirib ki, həmin gün işə gələrkən Ağadadaş Ağayevin balta ilə arxasınca gəldiyinin şahidi olub.

Qeyd edib ki, içəri daxil olanda bir nəfər nalayiq ifadələr işlədə-işlədə mühafizəçi Nurəddin Cəlilova yaxınlaşıb. Həmin şəxsin Ağadadaş Ağayev olduğunu bilməyib. Bir müddət sonra Nurəddin Cəlilovun üzünün qanlı olduğunu və təcili yardıma yaxınlaşdığını görüb.

Təqsirləndirilən Ağadadaş Ağayevin vəkili hər üç şahidin məhkəmədəki ifadələri ilə ibtidai istintaqa verdikləri ifadələr arasında ziddiyyət olduğunu qeyd edib.

İş üzrə növbəti məhkəmə prosesi fevralın 6-na təyin edilib.