Vəzifədən gedən vətən düşməni olur | Sabir Rüstəmxanlı kimləri tənqid etdi? - AMİN

“Amin” verilişinin yeni buraxılışı yayımlanıb.

Proqramda Xalq şairi Sabir Rüstəmxanlı ilə vətəndaşlıq mövzusu müzakirə olunub.

Bəzi insanların keçmişi inkar etdiklərini söyləyən Sabir Rüstəmxanlı bunun səbəbini sosial medianın mənfi təsirlərində görür:

“Sosial media insanların beynini yuyur, onları manqurta çevirir. Bu, dünyada gedən prosesdir. Təəssüflər olsun ki, biz belə şeylərə daha yatqınıq. Ona görə bəzi insanlar keçmişi, Nizami Gəncəvi, Məhəmməd Füzuli, Mirzə Ələkbər Sabiri və s. inkar edirlər. Bu təbliğat insanlara təsir edir, onları köklərindən ayırmağa çalışır”.

Xalq şairinin sözlərinə görə, insanların mənəvi keyfiyyətlərini itirdikləri cəmiyyətdə dəyərlərimizi qorumaq vacibdir:

“Yalnız Yer qanunları ilə idarə olunan cəmiyyətlər gec-tez sıxıntılar yaşayacaq. Dünyanın hər yerində müxtəlif qanunlar qəbul olunsa da, insanlar ona əməl etmirlər. Dinlərə görə çoxlu qan tökülüb. Bu savaşlar indi də gedir, insanlar mənəvi keyfiyyətlərini itirirlər. Ona görə də cəmiyyətdə mənəviyyatımızı, dəyərlərimizi qorumaq son dərəcə önəmlidir”.

Sabir Rüstəmxanlı həmçinin cəmiyyətdəki digər problemlərə də toxunub.

“60-cı illərin kəndləri üçün darıxıram, çünki orada icma düşüncəsi, birlik var idi. Cəmiyyətdə belə bir problem var: məsələn, məktəb direktoru uzun illər kresloda oturur, onu işdən çıxaranda isə hakimiyyətə düşmən olur. Başa düşmürlər ki, yeni nəsil gəlir, gənclərə yer vermək lazımdır. Vətənə düşmən olmaq olmaz”, – deyə o əlavə edib.