Vəziyyəti ağır olur, pul çatdıra bilmirik... | Talassemiyadan əziyyət çəkən uşağın anası danışdı

Balaca Aydının 9 yaşı var. 6 aylığından bəri beta-talassemiyadan əziyyət çəkir.

Aydının müalicəsi üçün ailəsi 10-15 gündən bir Balakəndən paytaxta üz tutmaq məcburiyyətində qalır.

“Yola 200 manatdan çox pulumuz çıxır. Bəzən çatdıra bilmədiyimiz üçün Şəkidə qalırıq. Düzdür, Şəkidə qan vurulur. Amma analizləri vermək mümkün deyil, buna görə də Bakıya getməyə məcburuq. 8 saat yol gedirik, saat 5-də xəstəxanaya çatırıq, 9-da iş başlayır. Növbə bizə çatana kimi uşaq ac-susuz qalır”, − deyə azyaşlının anası bildirib.

Məsələ ilə bağlı Səhiyyə Nazirliyindən bildirilib ki, hazırda rayon xəstəxanalarında talassemiyadan əziyyət çəkən xəstələr üçün talassemiya bölməsinin nəzarəti altında qan köçürülmə imkanları mövcud deyil. Bununla bağlı bir sıra təkliflər var. Məsələnin həlli istiqamətində aidiyyəti qurumların qərar və tədbirləri gözlənilir.