“Whatsapp” yazışmalarınız gizli şəkildə necə izlənilir? - Onları gözləyən cəza isə...

“WhatsApp” izləmə xidməti – sosial şəbəkələrdə belə elanlar kifayət qədərdir.

Kimisi güvənmədiyi sevgilisini, kimisi də həyat yoldaşını bu üsulla sınağa çəkir. Belə ki, müəyyən pul müqabilində yoxlamaq istədiyi şəxsin nömrəsini təqdim edir və proses başlayır.

Baku TV-nin apardığı sorğudan aydın olub ki, bu üsuldan istifadə edənlər də az deyil.

“Rəfiqəm sevgilisini yoxlamaq üçün “WhatsApp” izləmə xidmətindən istifadə edib. Nəticəsi yaxşı olmayıb. Həqiqəti görəndən sonra ayrılıblar”, – deyə sakinlərdən biri söyləyib.

Bəs maraqlıdır, bu kimi hallar qanunvericilikdə necə tənzimlənir? Bu xidməti göstərənləri hansısa cəza gözləyirmi?

Hüquqşünas Hikmət Əliyevin sözlərinə görə, bu xidmət mahiyyətcə dedektiv xidmətlərinə bənzəyir:

Qanunvericilikdə dedektiv xidmətləri fəaliyyət olaraq qadağan edilib. Lakin sosial şəbəkələrdə şəxsləri yoxlamaq məqsədilə onlara SMS-lər yazmaq və s. kimi hərəkətlərə görə cinayət məsuliyyəti müəyyən edilməmişdir. Lakin bu prosedurlar çərçivəsində şəxs mənəvi zərərə məruz qalarsa, zərərin ödənilməsi barədə iddia qaldırıla bilər”.