Xalq artistinin məhkəməsində insident yaşandı | Vəkillərin sualları aranı bir-birinə qatdı

Xalq artisti Ağadadaş Ağayevin cinayət işi üzrə məhkəmənin növbəti baxış iclası keçirilib.

Binəqədi Rayon Məhkəməsinin hakimi Vüsal Tağıyevin sədrliyi ilə baş tutan prosesdə təqsirləndirilən Xalq artisti sərbəst ifadə verib.

O, ifadəsində qeyd edib ki, həmin gün xəstəliyi ilə əlaqədar kəskin ağrıları olub. Bu səbəbdən yaxınlıqdakı klinikanın mühafizəçisindən yardım istəyib. Xalq artistinin sözlərinə görə, bu zaman mühafizəçi ona kobud cavab verib. “Sən kimsən qışqırırsan, özünü kim hesab edirsən?” kimi vulqar ifadələr işlədib. Bununla yanaşı, hətta şəxsiyyətinə toxunan təhqiramiz ifadələr işlətdiyini də bildirib.

Bundan sonra Ağadadaş Ağayev həyətə düşərək mühafizəçiyə iradını bildirmək istəyəndə onun əlindəki dəmir parçası ilə Xalq artistinə tərəf gəldiyini görüb. Özünümüdafiə məqsədilə həyətində istifadə etdiyi balta gözünə dəyib. Ağadadaş Ağayev baltanı götürərək Nurəddin Cəlilova tərəf atıb. Balta isə mühafizəçiyə yox, orada çalışan xadimə Nəzakət Paşayevaya dəyib.

Xalq artisti ifadəsində deyib ki, onlar əlbəyaxa olduqdan sonra aldığı zərbələrdən müvazinətini itirərək yerə yıxılıb. Daha sonra hadisə yerinə yaxınlaşan taksi sürücüsünün köməyi ilə evə aparılıb.

Prokurorun “Törətdiyiniz əmələ münasibətiniz necədir” sualına Ağadadaş Ağayev “çox pis”, günahkar kimi yox, bir insan kimi peşman olduğunu deyib.

Qarşı tərəfin vəkillərinin suallarını Xalq artisti aqressiv qarşılayıb. Bu səbəbdən zərərçəkənin müdafiəçisi məhkəmə sədrinə bu barədə şifahi şikayət edərək Xalq artistinin onun hüquqlarını pozduğunu deyib. Hakim hər iki tərəfi nəzakətli olmağa, məhkəmə qanunlarına riayət etməyə çağırıb.

Zərərçəkən Nəzakət Paşayevanın vəkili Gülşən Salmanova vəsatət qaldıraraq Ağadadaş Ağayevin ibtidai istintaqa verdiyi ifadəsi ilə məhkəmədəki ifadəsi arasında ziddiyət olduğundan həmin ifadənin məhkəmədə elan edilməsini istəyib. Vəsatət qəbul olunaraq Xalq artistinin ifadəsi prosesdə elan edilib. Məhkəmənin növbəti iclası dekabrın 17-nə təyin olunub.

Qeyd edək ki, müğənni ilə mühafizəçinin hər ikisinə yekun olaraq Cinayət Məcəlləsinin 221.3-cü (xuliqanlıq), 221.3-cü (silah qismində istifadə olunan əşyalardan istifadə etməklə törədildikdə) maddəsi ilə yekun ittiham elan edilib. Onlar bu maddə ilə təqsirli bilindikləri halda 2 ildən 5 ilə kimi azadlıqdan məhrum olunacaqlar.