Xanım idmançımızdan İrəvanda baş verənlərə reaksiya

“Mənə elə gəlir ki, Ermənistan xalqı Azərbaycan Dövlət Himninin orada ikinci dəfə oxunmasının qarşısını almaq üçün belə bir təxribat törətdi”.

Bunu Ermənistanın paytaxtı İrəvanda keçirilən Avropa çempionatından imtina edərək Vətənə qayıdan ağırlıqqaldırma üzrə Azərbaycan millisinin üzvü Nazilə İsmayılova Heydər Əliyev Beynəlxalq Aeroportunda jurnalistlərə açıqlamasında deyib.

O, əslində, aprelin 14-də İrəvanı tərk etmək qərarına gəldiklərini bildirib: “Axşam saatlarında hoteli tərk etmək istəyəndə dedilər ki, sizin təhlükəsizliyinizi təmin edə bilmirik, buradan çıxmayın. Prezident İlham Əliyev və Birinci vitse-prezident Mehriban Əliyevanın köməyi sayəsində federasiyamızın nümayəndələri bizi Vətənə sağ-salamat qaytardılar”.

Qeyd edək ki, Avropa çempionatının aprelin 14-də keçirilən açılış mərasimində Azərbaycan bayrağı yandırıldığı üçün millimiz yarışdan imtina edib.