Xankəndi və Laçına səfər etmək istəyənlərin diqqətinə: Biletləri belə ala bilərsiniz!

“Böyük Qayıdış” Proqramı çərçivəsində Azərbaycan Yerüstü Nəqliyyat Agentliyi (AYNA) tərəfindən iyulun 7-dən Bakı-Xankəndi-Laçın istiqamətində növbəti müntəzəm avtobus reysi istifadəyə veriləcək.

Bu barədə AYNA-dan məlumat verilib.

Bildirilib ki, məqsəd işğaldan azad edilmiş ərazilərdə məskunlaşan vətəndaşların keyfiyyətli nəqliyyat xidmətləri ilə təmin olunmasıdır.

Avtobuslar hər gün Bakı Beynəlxalq Avtovağzal Kompleksindən saat 11:00-da hərəkət edəcək. Reys üzrə aralıq məntəqə olaraq Xocalı, Xankəndi və Şuşa şəhərləri təyin edilib.

Avtobuslar Laçın şəhərindən saat 09:00, Şuşa şəhərindən 10:00, Xankəndi şəhərindən 10:30, Xocalı rayonundan isə 11:00-da yola düşəcək.

Bakı-Laçın və əks istiqamətdə biletin qiyməti 16,1 manat, Bakı-Şuşa və əks istiqamətdə 14,8 manat, Bakı-Xankəndi və əks istiqamətdə 14,2 manat, Bakı-Xocalı və əks istiqamətdə isə 13,9 manat təşkil edir. Biletləri yalnız “biletim.az” portalı üzərindən onlayn qaydada əldə etmək olar.

Qeyd edək ki, biletləri əldə edərkən işğaldan azad olunmuş ərazilərə girişlə bağlı buraxılış qaydalarına uyğun olaraq icazələrin olması mütləqdir.