Xankəndidə yeni marşrut şəbəkəsi yaradılıb | 3 xətt üzrə marşrut istifadəyə verildi - Baku TV

Xankəndi şəhərində mobillik imkanlarının yaxşılaşdırılması və ictimai nəqliyyatın əlçatanlığının artırılması istiqamətində təhlillər aparılıb, yeni marşrut şəbəkəsi hazırlanıb.

Bu barədə Azərbaycan Yerüstü Nəqliyyat Agentliyinin mətbuat katibi Tural Orucov Baku TV-yə açıqlamasında məlumat verib.

Onun sözlərinə görə, şəhərdə sərnişindaşıma xidməti yaşıl enerji konsepsiyasına uyğun təşkil olunacaq. Bu yanaşma bölgədə müasir, dayanıqlı və ekoloji cəhətdən təmiz nəqliyyat infrastrukturunun formalaşmasına töhfə verəcək.

“İlkin mərhələdə şəhərdaxili üç marşrut xətti fəaliyyət göstərəcək və əsas küçə və prospektləri əhatə edəcək. “BakuBus” MMC tərəfindən 10 ədəd müasir, ekoloji cəhətdən təmiz elektrik mühərrikli nəqliyyat vasitəsi sərnişinlərin xidmətinə veriləcək. Avtobuslar 15 dəqiqəlik intervalla fəaliyyət göstərəcək”, – deyə Tural Orucov bildirib.