Xaosun gündən-günə artdığı küçə | Hərəkət niyə iflic oldu? | NECƏ OLMALIDIR

“Necə olmalıdır?” rubrikasının yeni buraxılışı yayımlanıb.

Budəfəki buraxılışda paytaxtın Hüseyn Seyidzadə küçəsində sürücülərin qarşılaşdıqları problem haqqında məlumat verilib.

Bildirilib ki, sözügedən ərazidə avtomobillərin hərəkətini çətinləşdirən hal geri dönmə yerində yaşanır. Döngədə 1.11 nişanlanma xətti var. Bəzi sürücülər qaydaları pozub bir sıra ilə dönmək əvəzinə iki, hətta üç sıra ilə geri dönürlər. Bəzən də sağ zolaqdan sola dönənlər olur ki, bu halda da qəza şəraiti yaranır.

Geri dönmə yerinin döngədə olması iriqabaritli avtomobillərin qarşıdan gələn yolu bağlamalarına səbəb olur. Əvvəl 1.11 nişanlanma xətti geridə idi və xaos hazırkı həddə deyildi. İndi isə həm yan məhəllələrdən çıxanlar, həm də əsas yoldan geri dönənlər hərəkəti iflic vəziyyətə salırlar.

Bundan başqa, geri dönəndən sonra “Dayanma və durma qadağandır” nişanı var. Ağaclar isə onun görünməsinə mane olur. Bunu görməyən sürücülər də döngədən sonra parklanma edirlər.