Xına mərasimlərinin əl yandıran qiymətləri | Qiymətlər açıqlandı

Xalqımızın toy kimi bir adəti var. Bu adətlərin içində xınayaxdı mərasimi də özünəməxsus yer tutur.

Xınayaxdı mərasimlərinin tarixi qədimlərə gedib çıxır. Folklorşünasların sözlərinə görə, əvvəl keçirilən mərasimlərlə indikilər arasında böyük fərq var.

Xüsusilə son günlər sosial şəbəkələrdə trendə çevrilən “Tanrı, məni quş eylə” ifadəsi bayatı sözləridir ki, onunla bağlı video qısa müddətdə məşhurlaşdıqdan sonra bu ifadə bəzi xınayaxdı mərasimlərində “tələb” olunur.

Folklorşünas İlhamə Qəsəbovanın sözlərinə görə, xınayaxdı mərasimləri son zamanlar məcrasından kənara çıxıb:

“Haxıştalarda ifrata varmaq və sözün mənasını dəyişmək kimi amillərə rast gəlirik. Onların içərisində son zamanlar eşitdiyimiz təhrif olunmuş, mənası həm bayağı, həm də yersiz ifadə olunan sözlər var. Təəssüf edirəm ki, həmin sözlərdən xınayaxdı mərasimlərində istifadə edirlər”.

Qeyd edək ki, sözügedən mərasimlərdə deyilən haxıştaların özünəməxsus qiymətləri var. Xınayaxdı mərasimi aparıcısı Selcan Ağayeva bildirib ki, VİP paketlərin qiyməti 1 000 manatdan 7 000 manatadək dəyişir:

“Bunun içinə hər şey daxildir. Amma qiyməti 7 000 manatdan çox olan paketlər də var. Elə bir xınaya getmişdik ki, həmin mərasimin qiyməti 80 000-ə yaxın idi”.