Xırdabuynuzlu heyvanlarda xəstəlik yayılıb

Bərdənin Qaratəpə kəndində xırdabuynuzlu heyvanlar arasında yayılan xəstəlik kütləvi tələfata səbəb olub.

Fermerlər iddia edirlər ki, bu, çiçək xəstəliyidir. Bu səbəbdən heyvanlarda məhsuldarlıq aşağı düşüb, mayalanma getmir, dölvermə gecikir. Xüsusilə yeni doğulan quzular tələf olur.

Çıxılmaz vəziyyətdə qalan fermerlər heyvan ölümünün qarşısını almaq üçün vaksin tapa bilmirlər. Təsərrüfat sahiblərinin sözlərinə görə, 20 günə yaxındır yaranan bu vəziyyət onlara xeyli miqdarda ziyan vurub. Ərazi üzrə baytar həkimlərə müraciət etsələr də, heyvanların dərdinə çarə tapılmır.

Fermerlər bildirirlər ki, çiçək xəstəliyinin qarşısını almaq üçün vurulan vaksinlər yalnız baytarlara verilir. Həkimlər isə bu xəstəliyə qarşı peyvənd olmadığını deyirlər.

Məsələ ilə bağlı Bərdə rayon baytarlıq idarəsindən bildirilib ki, sözügedən təsərrüfatlarda vaxtında çiçək və digər xəstəliklərə qarşı vaksinasiya həyata keçirilib. Heyvan ölümlərinin hansı səbəbdən baş verməsi dəqiq bilinmir. Cəsədlərdən nümunələr götürülərək laboratoriyaya göndəriləcək. Dəqiq səbəb məlum olandan sonra lazımi tədbirlər həyata keçiriləcək.