Xızıda vətəndaşlarımız köməksiz vəziyyətdə qalıb

Xızı rayonunun Gimçi kəndinə ziyarətgaha yollanan 24 nəfər geri qayıda bilməyib.

Güclü sel səbəbindən yoldan keçmək mümkün olmadığından insanlar dağlıq ərazidə, yaşayış olmayan yerdə, avtobusun içində qalıblar.

Şəbəkə tutmadığından onlarla əlaqə yaratmaq da mümkün olmayıb. Bu barədə Baku TV-yə ziyarətgaha yollanan şəxslərdən birinin ailə üzvü məlumat verib.

Məsələ ilə bağlı Fövqəladə Hallar Nazirliyindən də açıqlama verilib. Qurumdan bildirilib ki, Xızıda sel səbəbindən 24 nəfər köməksiz vəziyyətdə qalıb. Nazirliyə rayonunun Ağdərə kəndində intensiv yağan yağışların əmələ gətirdiyi sel suları nəticəsində yararsız vəziyyətə düşən avtomobil yolunda avtobusda 24 nəfər sərnişinin köməksiz vəziyyətdə qalması barədə ilkin məlumat daxil olub.

Həmin vətəndaşların təxliyəsi üçün Mülki Müdafiə Qoşunları və Sumqayıt Regional Mərkəzinin qüvvələri və xüsusi texnikaları, o cümlədən ilk yardım üçün həkim briqadası cəlb olunub.