“Xocalı” gəmisi istismara verildi | İlk səfər və təfərrüatlar açıqlandı

“Azərbaycan Xəzər Dəniz Gəmiçiliyi” QSC-nin (ASCO) donanmasına “Handysize” ölçü tipli “Xocalı” adlı ilk gəmi qəbul edilib.

Gəmiyə bu ad Prezident İlham Əliyevin tapşırığına əsasən verilib.

Çində Dövlət Himnimizin sədaları altında gəmidə Azərbaycanın üçrəngli dövlət bayrağı qaldırılıb və “Xocalı” istismara qəbul olunub.

“Xocalı” gəmisi 38 593 ton yükgötürmə imkanına malikdir. Bu da mövcud quru yük gəmilərinin yükgötürmə qabiliyyətindən təxminən 8 dəfə çoxdur. Gəminin uzunluğu 180 metr, eni 30 metr, bortunun hündürlüyü 15 metr, suya oturumu 10,47 metr, maksimum sürəti 15,7 uzeldir. Suya oturumu maksimum yük götürməklə, onun bir çox dayaz limanlara belə rahatlıqla daxil olmasına şərait yaradır.

“Xocalı” gəmisinin yükləndikdən sonra ilk səfəri Cənubi Koreya limanından ABŞ-nin “Portland” limanınadır. Bununla da, “Xocalı” müstəqil Azərbaycan bayrağı altında Amerika sularında üzəcək ilk gəmi olacaq.