Xocalı günü-gündən dirçəlir

Xocalı şəhərinin içməli su təchizatının yaxşılaşdırılması məqsədilə yeni su mənbəyi yaradılır.

Bu barədə işğaldan azad edilmiş ərazilərdə məsələlərin mərkəzləşdirilmiş qaydada həlli ilə bağlı Əlaqələndirmə Qərargahından məlumat verilib.

Şəhərin içməli su ilə təchizatı məqsədilə mənbədən götürülən su həcmi 500 kubmetr olan anbara ötürüləcək və buradan şəhərə paylanacaq.

Qarabağ Regional Sukanal İdarəsindən bildirilib ki, Böyük Qayıdış planına uyğun olaraq Xocalı şəhərində məskunlaşmanı nəzərə alaraq Dövlət Su Ehtiyatları Agentliyinin sifarişi ilə 1 ədəd əlavə subartezian quyusu qazılır:

“İkinci subartezian quyusunun qazılmağı gələcəkdə Xocalı sakinlərinin 24 saat su ilə təmin olunmasına dəstək olacaq. Hal-hazırda Xocalı şəhərində yeni su və kanalizasiya şəbəkəsinin tikintisi işləri davam etdirilir. Bu da yenə Xocalı sakinlərinin su təminatında böyük rol oynayacaq”.

Qeyd edək ki, Xocalı şəhərinin bir hissəsində mərkəzləşdirilmiş paylayıcı su şəbəkəsi mövcuddur. Kanalizasiya şəbəkəsi isə şəhərin kiçik bir hissəsini əhatə etməklə istismara yararsız vəziyyətdədir. Hazırda şəhərə, eləcə də rayonun bir neçə kənd və qəsəbəsinə Xocalı Sukanal İdarəsi tərəfindən xidmət göstərilir.