Yeni il hədiyyələrindəki təhlükə | Övladlarımıza öz əllərimizlə zəhər veririk?

Yeni ilin astanasındayıq. Bayramın gəlişi ilə əlaqədar mağazalarda uşaqlar üçün hədiyyələr satışa çıxarılıb.

Hədiyyələrin qiyməti 5 manatdan başlasa da, 10, 18 manata satılanlar da var. Bəs valideynlərin balacaları sevindirmək üçün aldıqları bu hədiyyə bağlamalarının içi də qablaşdırması qədər keyfiyyətlidirmi?

Baku TV-nin apardığı kiçik araşdırma zamanı məlum olub ki, valideynlərin bir çoxunun aldığı Yeni il hədiyyələrinin içindəki məhsullar keyfiyyətsiz çıxıb.

Adətən Yeni il hədiyyəsi alarkən bağlamanın içini açıb baxmaq olmur. Azad İstehlakçılar Birliyinin sədri Eyyub Hüseynovun sözlərinə görə, bəzən böyük biznes qurumları vaxtı keçmiş məhsulları gözoxşayan, fərqli qablaşdırılmada istehlakçılara satırlar.

“İllərdir biznes qurumları vaxtı keçmiş, pis vəziyyətdə saxlanılmış, geri qaytarılmış malları qablaşdıraraq Yeni il şənlikləri təşkil edən müəssisələrə, yaxud birbaşa istehlakçılara satırlar. Yeni ildən sonra Azad İstehlakçılar Birliyinə bu məhsullardan zəhərlənmə ilə bağlı gələn şikayətlər birinci yerdədir”, – deyə E.Hüseynov bildirib.

Qida mütəxəssislərinin sözlərinə görə, hədiyyə bağlamalarının saxlanılma qaydalarına düzgün əməl edilməlidir. Əsk halda qutunun içindəki məhsulların tərkibi dəyişə və zəhərlənməyə səbəb ola bilər.