Yerə elə nəhəng bir şey yaxınlaşır ki... | Minlərlə nüvə bombasına bərabər olan təhlükə

Yerə 10 mərtəbəli bina ölçüsündə nəhəng asteroid yaxınlaşır. Bu barədə NASA-nın alimləri xəbər veriblər.

Bildirilir ki, 2024 XN1 adlandırılan səma cismi Milad bayramı ərəfəsində, yəni dekabrın 24-ü, bəlkə də elə Milad bayramında – 25 dekabr tarixində planetimizin yanından keçəcək. Səma cisminin Yer üçün potensial təhlükə olduğu vurğulanır.

Alimlərin qiymətləndirməsinə görə, əgər bu kosmik obyekt planetimizlə toqquşsa, onun zərbə dalğası bir neçə min nüvə bombasının partlayışına bərabər olar. Buna görə də NASA alimləri səma cisminin hərəkət trayektoriyasını diqqətlə izləyirlər.

Qeyd etmək lazımdır ki, bu, iri asteroidlərin Yerə təhlükəli məsafədə keçdiyi ilk hal deyil. Təkcə dekabr ayının əvvəlində NASA planetimizə eyni vaxtda iki potensial təhlükəli kosmik obyektin yaxınlaşdığını qeydə alıb. 3 və 4 dekabr tarixlərində bu asteroidlər Yerdən müvafiq olaraq təxminən 2 və 5 milyon kilometr məsafədə keçiblər.

Xatırladaq ki, Milad bayramı dekabrın 25-də – İsa peyğəmbərin güman edilən doğum günündə qeyd olunur.