Yevlax bazarında pomidorun qiyməti əl yandırır

Fəsil dəyişdikcə bazarların piştaxtalarını da mövsümi meyvə və tərəvəzlər bəzəyir.

Adətən bu cür məhsulların qiymətlərində ucuzlaşma müşahidə olunsa da, mövsümdən kənar, istixanalarda yetişdirilən tərəvəz bitkilərinə bunu aid etmək mümkün deyil.

Eyni mənzərə Yevlax bazarında da müşahidə edilir. Burada meyvə, tərəvəz, göyərti bolluğu olsa da, qiymətlər alıcıların ürəyincə deyil. Yevlax və qonşu rayonlardan bura üz tutanlar tərəvəzlərdən xiyarın, soğanın qiymətinin ucuzlaşdığını bildirirlər. Ancaq pomidorun bir kiloqramının 4,50-5 manata təklif edilməsi heç də hər cibə uyğun deyil. Qiyməti dəyişməz qalan isə qoz, fındıq ləpələridir.

Bazarda bəzi məhsulların qiymətinin gözləniləndən baha olmasını satıcılar da gizlətmir. Yeni çıxan soğan, kartof ucuzlaşsa da, pomidorun qiyməti əl yandırır.

Mütəxəssislər isə hesab edir ki, bu, daha çox pomidorun mövsümünün olmaması ilə əlaqədardır. İstixana şəraitində yetişdirilən məhsul əsasən ixrac edilir ki, nəticədə yerli bazarlarda qıtlıq yaranır.

Ramazan bayramına sayılı günlər qalıb. Bu ərəfədə bölgə sakinlərinin bazarlara daha çox axın edəcəyi gözlənilir. Alıcı qıtlığından şikayətlənən satıcılar isə bayramqabağı daha çox satış edib, yaranan boşluğu doldurmağa çalışacaqlar.