Yola çəkilən dairə sürücülərə qəza şəraiti yaradır? | Ekspertdən açıqlama

Nərimanov rayonu, Ağa Neymətulla küçəsində 3 yolun kəsişməsində çəkilən dairə yolda hərəkəti iflic edir.

Sürücülər bildiriblər ki, sözügedən dairə çəkiləndən sonra ərazidə hər gün qəzalar olur:

“Bu dairə çəkiləndən yol bərbad haldadır, buraya baxan yoxdur. Orada işarə də var, heç kim fikir vermir. Camaat çox əziyyət çəkir. Üçtərəfli yoldur, piyada keçidi də var. Dairə burada heç nəyə lazım deyil, fikir verən də yoxdur. Kim gəldi keçir”.

Maraqlıdır ki, ərazidə dairəvi hərəkəti göstərən heç bir nişan yoxdur, amma geriyə dönmək qadağandır nişanı quraşdırılıb.

Məsələ ilə bağlı Yerüstü Nəqliyyat Agentliyindən bildirilib ki, qeyd edilən ərazidə hərəkətin təşkili məqsədilə müvafiq yol nişanları qoyulub və nişanlanma xətləri çəkilib. Sürücülər də hərəkətdə olarkən ərazidə quraşdırılan yol nişanlarının tələblərini rəhbər tutmalıdırlar.

Ərazidə asfalt örtüyünə çəkilən dairəyə gəldikdə isə qurumdan bildirilib ki, orada dairəvi hərəkəti göstərən heç bir nişan quraşdırılmadığı üçün yerə çəkilən dairənin də heç bir qüvvəsi yoxdur.