Yolda qalanların köməyinə FHN çatdı

Fövqəladə Hallar Nazirliyinin (FHN) “112” qaynar telefon xəttinə Bakı şəhərinin Binəqədi rayonunda bir nəfərin xəstəxanaya aparılması zərurətinin yaranması, qarlı-buzlu hava şəraiti ilə əlaqədar həkim briqadasına müvafiq köməkliyin göstərilməsi üçün müraciət daxil olub.

Müraciətlə əlaqədar FHN-in Bakı Regional Mərkəzinin xilasediciləri çağırış ünvanına cəlb olunub.

Xilasedicilər xüsusi vasitələrin köməkliyi ilə 1954-cü il təvəllüdlü Ş.Əliyevi fərdi yaşayış evinin həyətinə endirərək təcili tibbi yardım briqadasına təhvil verib.

Həmçinin bildirilib ki, güclü qar yağması və şaxta səbəbindən Şəki-Qax avtomobil yolunun Şəkinin Qoxmuq kəndi ərazisindən keçən hissəsində yollar buz bağlayıb, avtomobillərin hərəkəti çətinləşib.

Bununla əlaqədar olaraq Fövqəladə Hallar Nazirliyi Dövlət Yanğından Mühafizə Xidməti Şəki rayon Yanğından Mühafizə Hissəsinin texnikası və şəxsi heyəti əraziyə cəlb olunub və yolda qalan avtomobillərin hərəkəti bərpa edilib.