Yumurta ağının bilinməyən təhlükəsi | Hansı orqanın işinə mənfi təsir edir?

Şimali Karolina Universitetinin tədqiqatçıları müəyyən ediblər ki, yumurta ağında olan zülal bağırsağın selikli qişasını zəiflədən maddənin yaranmasını stimullaşdıra bilər.

Təcrübə zamanı siçanlar yalnız bir zülal mənbəyi olan müxtəlif pəhrizlərlə qidalandırılıb. Cəmi bir həftə sonra mikrobiomda ciddi dəyişikliklər qeydə alınıb.

Metagenomika və metaproteomika üsulları ilə aparılan analizlər göstərib ki, fərqli zülal növləri bağırsaq mikroblarının aktivliyinə və maddələr mübadiləsi funksiyalarına müxtəlif cür təsir edir.

Postdoktorant Alfredo Bleykli-Ruiz bildirib ki, zülal mənbəyindəki hər bir dəyişiklik mikrobiomda nəzərəçarpacaq dəyişikliklərə səbəb olurdu. Xüsusilə qəhvəyi düyü, maya və yumurta ağı ilə qidalanma zamanı təsir daha güclü idi. Bəzi pəhrizlər qidalarla qəbul edilən aminturşuları parçalayan mikrobların aktivliyini artırırdı.

Alimlərin sözlərinə görə, bu aminturşularının parçalanma məhsulları həm ümumi sağlamlığa, həm də bağırsaqla beyin arasındakı əlaqəyə təsir edə bilər.

Tədqiqat zamanı həmçinin məlum olub ki, zülallara birləşmiş mürəkkəb karbohidratlar mikrobların hansı fermentləri istehsal etdiyinə təsir göstərir. Məsələn, yumurta ağı ilə qidalanma zamanı aktivləşən müəyyən bir bakteriya bağırsağın qoruyucu selikli qişasını təşkil edən musini parçalayan fermentlərə bənzər fermentlər ifraz etməyə başlayıb. Bu da göstərir ki, bəzi növ zülal əsaslı pəhrizlər həzm sistemi üçün risk yarada bilər.