Zeytunun insan orqanizminə ziyanı və xeyri nələrdir? | Dietoloqdan mühüm açıqlama
Zeytunun tərkibində insan orqanizmi üçün çox faydalı maddələr var, lakin onun həddindən artıq istehlakı sağlamlığa ciddi ziyan vura bilər.
Bunu tibb elmləri doktoru, dietoloq Mixail Qinzburq “Sputnik”ə müsahibəsində deyib.
“Aralıq dənizi və Fransa mətbəxində yüksək qiymətləndirilən zeytun yağı bir sıra müalicəvi xüsusiyyətlərə malikdir. Omeqa-9 doymamış yağ turşuları ilə zəngin olan bu yağı normada istehlak etsək, iltihablanma və damar xəstəliklərinin yaranma riskini azaltmış olarıq”, – deyə dietoloq bildirib.
Onun sözlərinə görə, bu meyvənin əsas faydası həm də tərkibində antioksidantların və müxtəlif mikro və makroelementlərin yüksək olmasındadır.
“Lakin zeytun adətən duzlanır və ya turşu halında istehlak edilir. Bu da zeytunu çox yüksək duz ehtiva edən məhsula çevirir. Belə qidanın həddindən artıq istehlakı damar divarlarına mənfi təsir göstərir və hipertoniyanın inkişafına səbəb olur. Tədqiqatlar artıq duzun haradasa əlavə şəkər qədər təhlükəli və erkən ölümə səbəb olduğunu göstərir”, – deyə ekspert qeyd edib.
M.Qinzburq əlavə edib ki, optimal miqdar gündə 2-3 ədəddir:
“Eyni zamanda əgər piylənmə əlamətləri varsa və ya hipertoniyadan əziyyət çəkirsinizsə, zeytunu, ümumiyyətlə, qida rasionuna daxil etməməyiniz daha yaxşı olar”.
Qeyd edək ki, bundan əvvəl sağlam qidalanma üzrə mütəxəssis Tatyana Meşçeryakova bildirmişdi ki, həddindən artıq duz istehlakı hipertoniyaya gətirib çıxarır. O bunun həmçinin çəki artımına səbəb olduğunu, böyrək funksiyasını, maddələr mübadiləsini pozduğunu diqqətə çatdırmışdı.
![icon](/images/loading.png)