1000-dən çox insan... | Müharibənin dəhşətə gətirən nəticələri

Rusiya ordusu oktyabrın 20-dən 21-nə keçən gecə Ukraynanın bir neçə şəhərini dron və raketlərlə atəşə tutub.

Gecə paytaxt Kiyevdə ard-arda iki dəfə hava hücumu təhlükəsi elan edilib.

Çerniqov vilayətinin hərbi administrasiyanın rəhbəri Vyaçeslav Çaus “Telegram” kanalında paylaşım edərək bildirib ki, oktyabrın 21-i səhər saatlarında Çerniqov da Rusiya Silahlı Qüvvələrinin kütləvi hücumuna məruz qalıb. Hadisə nəticəsində istilik və enerji obyektləri zədələnib, bölgənin bir hissəsi işıqsız qalıb. Bir neçə ərazidə yanğınlar baş verib.

Xerson vilayəti də gecə ərzində “Şahed” tipli PUA-ların hücumuna məruz qalıb, 3 nəfər xəsarət alıb.

Bundan başqa, vilayətdə mina partlamasından xəsarət alan 70 yaşlı qadın, 53 və 76 yaşlı kişilər xəstəxanaya yerləşdirilib. Onların müalicəsi davam etdirilir.

Ukrayna Silahlı Qüvvələrinin Baş Qərargahından bildirilib ki, son sutka ərzində Ukrayna ordusu Rusiyanın 1130 hərbçisini məhv edib.

Rusiya Müdafiə Nazirliyindən isə bildirilib ki, hava hücumundan müdafiə qüvvələri gecə ərzində Ukraynanın 55 PUA-sını məhv edib.