136 PUA ilə Ukraynaya hücum olunub

Oktyabrın 17-dən 18-nə keçən gecə Rusiya Ordusu 164 “Şahed”, “Qerbera” tipli PUA-dan və “C-300” raketlərdən istifadə edərək Ukrayna ərazilərinə hücumlar həyata keçirib.

Bu barədə Ukrayna Hava Hücumundan Müdafiə qüvvələrindən məlumat verilib.

Bildirilib ki, hücumlar Kursk, Oryol, Millerovo ərazilərindən edilib.

“Ukrayna aviasiyası, zenit-raket qüvvələri, elektron döyüş bölmələri və mobil atəş qrupları ölkənin şimalında, cənubunda, şərqində və mərkəzində hava hücumlarının qarşısını alıb. Qarşı tərəfin 136 pilotsuz uçuş aparatı vurulub və ya məhv edilib. 12 ərazidə 27 zərbə qeydə alınıb”, – deyə məlumatda bildirilib.

PUA ilə Poltavaya endirilən zərbələr nəticəsində yaşayış evlərində, iaşə obyektlərində yanğınlar baş verib.

Ukrayna Hərbi Qərargahından bildirilib ki, son sutka ərzində Rusiyanın daha 1150 hərbçisi zərərsizləşdirilib, 41 artilleriya sistemi isə sıradan çıxarılıb.

Rusiya Müdafiə Nazirliyindən isə bildirilib ki, Hava Hücumundan Müdafiə qüvvələri gecə ərzində Ukraynanın 41 PUA-sını məhv edib.